التغيير ....

#تقديم : ( ما فيك ما يقراه دوز نيشان للجُزء الأول )

بزاف ديال أصدقاء Feynbert كا يقُولو ليا،ما كرهتش نتغير و لكن ما عرفتش ملين نبدا ؟

أولا : تأمل معايا فهاد الجملة ديال : " ما كرهتش نتغير " و وصف ليا إحساسك ديالك ملي صاحبك كا يشوفك محنسر و غرقتي كريديات، و كا يقُول ليك ما كرهتش نعاونك و لكن ...

كي غا تحس ؟

نفس الإحساس هو لي كا يحس بيه الأنا ديالك ملي كا تكدب عليه بهاد المقولات لي كا يبداو بما "كرهتش" ، و كا يساليو ب " كرهت "

خلينا نتعمقُو مزيان فهاد الجُملة ديال "ما كرهتش" 

خليونا نديرو عملية الإدراج ( لانالوجي ديال الإعراب فاللغة العربية ) 

أعرب الجُملة التالية بالدارجة : ما كرهتش.

ما : ما النافية لي كا تعبر على عدم الرغبة.

كرهت : فعل ماضي يُعبر عن الكُره.

الشين "ش" : شين النفي لي كا تعبر على عدم الرغبة، دايرا بحالها بحال "ما."

من بعد ما بعد ما درنا عملية الإدراج غا نخرجو ب60تاج لي هو :

ما كرهتش = كرهت.

و بالتالي ملي يقُول ليك المغريبي ما كرهتش نعاونك، عرف بلي العقل الواعي ديالو الباطن كا يعبر على عدم الرغبة ديالو فأنهُ يعاونك.

نفس الشي يا كحل الراس، يا عديم الإحساس، ملي تقول ما كرهتش نتغير، فراك كا تعبر على الرغبة ديالك فعدم التغيير، و البقاء فمنطقة الراحة، و البقاء ف : ENSM 

Ecole National de Srite et de Mrite.

المدرسة الوطنية للسريط و المريط.

هذا من جهة، و من جهة أُخرى، تخيل معايا إذا قلت ليك : ما تفكرش فمش كحل.

واش تقدر ؟ أكيد دابا دماغك كا يفكر فيه.

60تاج :

ملي كا تقول لراسك ما تفكرش فشي حاجة، فراه عاد كا تزيد تحفز دماغك يفكر فيها.

و بالتالي ملي كا تعبر على عدم الكراهية، عرف أن العقل اللاواعي ديالك ما عندوش مع أدوات النفي : ( لا، ما، .. و أخواتها. ) و بالتالي كا تقول ما خاصنيش نكره، العقل اللاواعي هاكا كا يقراها : خاصني نكره. 

دابا غا ندخلو للمعقُول.

#الجُزء_الأول

قبل ما تفكرو ديرو #لعاقة، فكرو ديرو #علاقة.

أولا بينكُوم و بين ذاتكوم، تصالحو معاها، و قبلو عليها كيما هي ماشي كيما بغاوها، و رضاو عليها، و حضنوها بحُب.

ثانيا : علاقات مع الناس الصالحين لي عارفين علاش تزادو فهاد الكون. لي غا تستافدو منهوم و يستافدو منكوم. أو كما يقُول Feynbert : 

لي ما تاخُد منو لا نفع و لا إفادة، بعد عليه قبل ما تعادا.

#الجُزء_الثاني

قبل ما تفكرو تحققو #أرباح ، خلقو #قيمة.

ساهمو بشي حاجة تغيرو بيها المُجتمع، ما تبقاوش غير كا تنتاقدو فالمُجتمع، و نتوما جُزء منو.

بغيتي تغير #العالام ؟ ماشي ب #الكالام و ماشي ب #الأفلام أو فقط ب #الأحلام داكشي كووولو غير #أوهام ، و لكن :

بدا ب #فراشك، ثم #سنانك، ثم #بيتك، ثم #كوزينتك ... 

إذا نجحتي تغير غير هاد الربعة باراكا عليك، واخا كا يبانو صغار ( النتائج ديالهوم كبار).

حاس بيك ما فهمتيش العلاقة بين الفراش و السنان و البيت و الكوزينة و التغيير فالحوايج الكبار، أوكي هاك زيد فهم :

1- الفراش : كا يمثل النعاس ديالك لي كا ياخد ليك على الأكثر 8 ساعات من يومك، أي الثُلُث. ما يمكنش تنعس مرتاح، إذا ما كنتيش مقاد فراشك مزيان، و ما يمكنش تفيق مرتح إذ ما طويتيهش قبل ما تمشي للخدمة، لي بغيت نوصل هو : #النظام ، ما يمكنش تبدع و تنتج وسط الفوضى.

2- السنان : كا يمثلو العلاقات ديالك مع الناس، بصيغة أدق، الإبتسامة ديالك، ما يمكنش تكتاسب علاقات مزيانة و نتي كا تبتاسمي و تسدي فمك خايفة لا يشوفو سنانك. أو نتا كا تخاف لا تهضر و يشمو ريحة فمك.

3- البيت : كا يمثل لونتوراج و الأصدقاء لي ساكنين معاك أو العائلة، ما تعيشش وسط ناس كا ينقصو من القيمة ديالك و يحتاقروك و يستهزأو بالأحلام ديالك و يعاديوك بأفكار التشاؤم و السوداوية. 

4- كوزينتك : كا تمثل الأكل ديالك، ما يمكنش تاكُل ماكلة مزيانة فكوزينة موسخة، كا يبقاو فيها الماعن خامجين، حتى كا تبغي تاكُل عاد تنوض تغسلهوم بزربة، و ما يمكنش تاكل أكل صحي و نتا ما كا تمارسش رياضة باش تزيد من الإستفادة ديالك منو.

هذا ليس كل شيء تصفح باقي الصفحات وتعرف على باقي التفاصيل…

السابق

التالي