بزاف ديال الناس كيجريو وراء الحب ظنا منهم ان احتياج الانسان النفسي للحب هو الاحتياج الوحيد لي ممكن يخليه فرحان و مرتاح ، و ان اهم حاجة , هي انه يكون محبوب بالقدر و الطريقة لي باغي و من هنا مشاكله كلها غادي تتحل ... بحال الى زعما " حب و تحب " أغلب مشاكله النفسية او العاطفية غادي تحل ... بالرغم من اننا غالبا كيكونوا ضايرين بينا ناس كتبغينا او بعض المرات كنكونوا مُحاطين بطاقة حب كبيرة و واخا هاكاك حاسين انه شي حاجة باقية ناقصانا .. ولكن علاش !؟!
فاحد روايته العظيم George Orwell كيقول واحد الجملة عميقة : " Perhaps one did not want to be loved so much as to be understood. "
بمعنى انه الشخص ربما يكون ما محتاجش يتحب قد ما محتاج يتفهم !! و انا كنزيد على الفهم انه محتاج التقدير ايضا ,, فالفهم و التقدير هو للي كيحول الحب من علاقة أحادية مكونة من طرف خدام كيعطي اهتمام و رعاية , لعلاقة تفاعلية مشتركة مكونة من طرفين كينساجموا عقليا و نفسيا ببعضياتهم ..
فشنو فايدة حب أنت ما مفهومش و ممقدرش فيه ؟!
حب أضعف من انه يبني جسور فكرية بينك و بين للي كتبغيه ؟! .. حب ماشي ناضج و واعي بكل الدواخل ديالك و صراعاتك النفسية ؟!! .. فلي كيبغي شي حد بصح ميصلاحش يوقف عند فكرة انه كيبغيه و يسكت , و لكن خاصه يبذل مجهود أكبر ففهمه و يبعد على لي يجرح الطرف الاخر او تهينه .. فبزاف ديال العلاقات كتفشل و كتنهار واخا كتكون عن حب !! حيت ماكينش عنصر الفهم و التواصل الروحي ,, فأنا اه كنبغيك و بغيتك تكون مرتاح و لكن ما كنقدرش مشاعرك و كنحاول نسلبك ثقتك بنفسك لا و الاكثر من هادشي كنحملك مسؤولية اي غلط او خلاف وقع بيناتنا .
ففالاخير , الغرض ماشي التقليل من اهمية الحب فالعلاقة و لكن إعلاء لقيمة فهم الأخر و تقديره و احترام كيانه و مشاعره.. الغرض إدراك الحبيب ككيان نفسي فكري متكامل و ليس مجرد كيان عاطفي إنفعالي !! .. فاحساس زوين انك كانسان تلقى الشخص اللي تبغيه اكثر من انك تلقى لي يبغيك و يهتم بيك .. و لكن الأجمل و الأروع انك تلقى للي يقدرك و يفهمك و يحترم مشاعرك و مايعرضكش لاي اهانة و لو بالظحك.... للي يقدر يضمد جرحاك ماشي لي يزيد يفتحها
هذا ليس كل شيء تصفح باقي الصفحات وتعرف على باقي التفاصيل…
0 Komentar untuk "االحب_وحده_لا_يكفي"